General Books

சிங்கப்பூரின் வெற்றிக்குப் பல காரணங்கள் சொல்லப்படுகின்றன. இந்தியப் பெருங்கடலில் அதன் புவியியல் அமைவிடம், மக்களின் கடுமையான உழைப்பு, நிலையான அரசியல் சூழல், ராணுவ ஒழுங்கோடு நடைபெறும் அன்றாட நிர்வாகம், அமெரிக்கா உள்ளிட்ட மேற்கத்திய நாடுகளின் ஆதரவு என்று அந்தப் பட்டியல் நீளக்கூடும். லீ குவான் யூவிடம் ஒருமுறை கேட்டபோது `சிங்கப்பூர் மக்களின் தன்னம்பிக்கைதான் காரணம்’ என்றார். ஆனால் உலகப் பொருளாதார வல்லுநர்களும், அரசியல் நிபுணர்களும் ஒரே ஒரு காரணியைத்தான் திரும்பத் திரும்ப வலியுறுத்துகிறார்கள். அது லீ குவான் யூவின் தொலைநோக்குப் பார்வை.

மற்ற ஆசிய நாடுகள் எல்லாம் இடது மற்றும் வலதுசாரி சித்தாத்தங்களைப் பரிசோதித்துக் கொண்டிருக்கும்போது, உலகளாவிய சந்தைப் பொருளாதாரம் மூலம் மக்கள் நலன் என்று இயங்கிய லீயை மற்றவர்கள் முதலில் சற்று விநோதமாகத்தான் பார்த்தார்கள். பன்னாட்டு நிறுவனங்கள் மூலம் தொழிற்சாலைகள் சிங்கப்பூரில் உருவாகி லட்சக்கணக்கில் வேலை வாய்ப்பை உருவாக்கின. சுற்றுலா மேம்பாடு குறைந்த முதலீட்டில் அதிக பலன் என்பதை உணர்ந்து செயல்திட்டம் வகுக்கப்பட்டது. தரமான சேவை, நிலையான அரசியலுடன் நேர்மையும் ஒழுங்கும் சேர்ந்துகொள்ள, பல நாடுகளிலிருந்தும் நிறுவனங்கள் சிங்கப்பூர் நோக்கிப் பயணம் மேற்கொண்டன. உலகெங்கும் பயணம் மேற்கொண்டு பன்னாட்டு முதலீட்டை ஈர்க்கப் பல முயற்சிகளை மேற்கொண்டது சிங்கப்பூர். ஒரே ஒரு வித்தியாசம். மற்ற ஆசிய நாடுகள் இன்று செய்வதை 50 ஆண்டுகளுக்கு முன்பே செய்தது அந்தக் குட்டி தேசம்.

இன்று உலகின் தலைசிறந்த நிதிநிர்வாக நகரங்களுள் ஒன்றாக சிங்கப்பூர் உருவான கதை சுவையானது. துறைமுக நகரத்தில் வணிகம் மட்டுமே சாத்தியம் என்றாலும், அதன் நவீன வடிவத்தைத் தொழில்நுட்பத்தின் துணை கொண்டு உருவாக்கிடமுடியாதா என்ற கனவு அவருக்கு. சிங்கப்பூர் அரசின் ஆலோசகர்கள் உலகம் முழுக்கச் சுற்றுகிறார்கள். லண்டனின் பங்குச் சந்தை நிபுணர் ஒருவர் கூறிய யோசனை அனைவரையும் வியப்பில் ஆழ்த்துகிறது. அவர் சொன்னது `உலகின் பங்கு வர்த்தகமும், நிதி நிர்வாகமும் ஒவ்வொரு நாளும் சுவிட்சர்லாந்தின் சூரிச் நகரத்தில் தொடங்குகிறது. பின்னர் ஜெர்மனியின் ஃபிராங்க்பர்ட்... பின்னர் லண்டன் எனச் சில மணி நேர இடைவெளியில் தொடங்குகின்றன. மூன்று மணி நேரத்திற்குப் பிறகு நியூயார்க் நகரம் சுறுசுறுப்படைகிறது. பின்னர் அமெரிக்காவின் சான் பிரான்சிஸ்கோ தொடர் ஓட்டத்தில் இணைகிறது. ஆனால் அதற்குப்பிறகு அடுத்த நாள் காலை சூரிச் நகரம் விழிக்கும் வரை உலக நிதி வர்த்தகம் நீண்ட உறக்கத்தில் ஆழ்ந்துவிடுகிறது. எனவே இந்தக் கால இடைவெளியில் சிங்கப்பூர் இணைந்தால் 24 மணி நேரமும் உலகில் வர்த்தகம் நடைபெறும். உங்களால் முடியுமா” என்று கேட்கிறார். பொறி தட்டுகிறது லீ குவான் யூவிற்கு. உடனடியாய் நிதி மேலாண்மைச் சட்டங்கள், பங்குச் சந்தை விதிகள் மாற்றப்படுகின்றன. சிங்கப்பூரின் நிதி ஆலோசகர்கள் உறக்கம் தவிர்த்து உழைத்ததில் உலகம் நாள் முழுதும் இயங்கத் தொடங்கியது.

குறித்த நேரத்தில் தரமான சேவை, திறமையான நிதி நிர்வாகம், உலகளாவிய விளம்பரம், வணிகத்தில் நேர்மை என உலகில் காணக் கிடைக்காத அற்புதக் கலவை சிங்கப்பூரை உலக அரங்கில் அதிசயங்கள் நிறைந்த கனவு தேசமாக நிலை நிறுத்தியது. ‘மெர்லயன்’ என்ற சிங்க முகமும், மீனின் உடலும் கொண்ட சிங்கப்பூரின் தேசியச் சின்னம், ஒரு சிறு துறைமுக நகரம் உலக அரங்கில் தலைசிறந்து விளங்குவதை மிகச் சரியாகக் குறித்தது. சிங்கப்பூர் ஏர்லைன்ஸின் எழில் மிகு நங்கை உருவம் விருந்தோம்பலின் நளினத்தையும் வணிகத்தின் நேர்த்தியையும் ஒருங்கிணைத்து அனைவரது கவனத்தையும் ஈர்த்தது.

ஒரு பக்கம் சிங்கப்பூரை ஒட்டிய 80 தீவுகளிலும் கடலிலிருந்து நிலத்தை மீட்கும் முயற்சி; மழை நீரை முழுமையாகச் சேகரித்து, கழிவு நீரைச் சுத்திகரித்து நீர்த் தேவையை சமாளிக்கும் திட்டங்கள் நிறைவேறின. சிங்கப்பூர் நகரில் ஓடும் அசுத்தமான நதியைச் சுத்தமாக்கி மீன்கள் வளர்க்க வேண்டும் என்பது லீயின் கனவு. அதைக் கேள்விப்பட்ட லீயின் சகாக்களே நிறைவேற்ற முடியாத திட்டம் என எள்ளி நகையாடினர். அவ்வளவு செலவு செய்வதற்குப் பதில் அவ்வப்போது மீன்கள் வாங்கி விடலாம் என்ற குரூர யோசனை வேறு. ஆனால் அதையெல்லாம் பொருட்படுத்தாமல் இயங்கிய ,லீ பொறியாளர்கள் துணையோடு சில வருடங்களிலேயே சிங்கப்பூர் நதியைத் தூய்மையாக்கிக் காட்டினார். நகரெங்கும் பசுமையான புல்வெளிகள் அடர்ந்த மரங்கள் உருவாக்கிட தலைசிறந்த தாவரவியல் நிபுணர்கள் வரவழைக்கப்பட்டார்கள். மண்ணின் தரம், மழையளவு, தேவைப்படும் உரம் என ஆலோசனைகள் பெற்று வெப்ப மண்டல மழைக் காடுகளுக்குரிய தாவரங்கள் உலகின் பல நாடுகளிலிருந்தும் வரவழைக்கப்பட்டன.

மறுபுறம் குடிமக்களுக்குத் தரமான கல்வி, சுகாதாரம், அனைவருக்கும் சொந்த வீடு, தொழிலாளருக்குப் பொது நிறுவனங்களின் பங்குகள் என நலத்திட்டங்கள் விரிந்தன. `பள்ளிக்கூடங்களை விட்டு வெளியேவரும் குழந்தைகளைப் பார்த்தால் நாளை இவர்களுக்கு என்ன வேலை வாய்ப்பை ஏற்படுத்தித் தரப்போகிறோம்’ என்ற பதற்றம்தான் எங்களைத் தொடர்ந்து இயங்க வைத்தது என்று ஒரு முறை லீ குவான்யூ கூறினார். ஒவ்வொரு துறையிலும் திறமைமிக்கவர்களைத் தேர்ந்தெடுத்துப் பயன்படுத்திக்கொண்டார். அவர்களுக்கு முழுச் சுதந்திரம் கொடுத்து இயங்க வைத்து, `பெற்ற வெற்றிக்குக் காரணம் அவர்களே’ என்று கூறி அழகு பார்த்தவர். தனியார் நிறுவன அதிகாரிகளுக்கு இணையாக அதிக சம்பளம். அதே சமயம் ஊழலில் ஈடுபட்டால் கடும் தண்டனை. இதுதான் அவருடைய தாரக மந்திரம்.

தெருக்களில் அசுத்தம் செய்தால் அபராதம், போக்குவரத்து நெரிசல் மிகுந்த நேரங்களில் வாகனங்களுக்கு அதிக கட்டணம், குடும்பக் கட்டுப்பாடு, சிறுபான்மையினரின் கல்வி மேம்பாடு, பட்டதாரிப் பெண்களின் திருமணம் என அவருடைய தொலைநோக்குத் திட்டங்கள் அனைத்தும் காலத்தால் முந்தியவை.

ஒவ்வொரு புதிய யோசனையையும் மக்கள் மன்றத்தில் விவாதத்திற்கு விட்டு, பின் பாராளுமன்றத்தில் சட்டம் இயற்றுவது அவர் வழக்கம். தொடர்ந்து மக்களுடன் உரையாடிக் கொண்டே இருந்தார். தன்னுடைய 32வது வயதில் சீன மொழியைக் கற்றுக்கொண்ட லீ, தன் குழந்தைகளை சீன மொழிக் கல்வி கற்பிக்கும் பள்ளிகளுக்குத்தான் அனுப்பினார் என்பது குறிப்பிடத்தக்கது. ஆங்கிலத்தின் அவசியத்தை வலியுறுத்தியவர் சீன, மலாய் மொழிகளுடன் தமிழையும் ஆட்சிமொழியாக்கிச் சிறப்பித்தார்சிங்கப்பூரின் வளர்ச்சியில் தமிழர்களின் பங்கு கணிசமானது. வியர்வை சிந்திய அவர்களின் உழைப்பில் வானளாவிய கட்டடங்கள் கம்பீரமாய் எழுந்து நின்றன. தமிழரின் வணிக நேர்மையில் சிங்கப்பூரின் நம்பகத் தன்மை உயர்ந்தது. தொடக்கம் முதலே லீகுவான் யூவின் முயற்சிகளுக்குத் தோள் கொடுத்த தமிழர் தலைவர்களைக் குடியரசுத் தலைவர், அமைச்சர் என உயர் பதவிகளில் அமர்த்தி அழகு பார்த்தார். லீ குவான் யூவின் கருணைக் கரங்கள் ஈழத்தமிழர்களின் அவல நிலையைப் போக்கவும் நீண்டது குறிப்பிடத்தக்கது.